ប្រវត្តិសាស្រ្ត និង ពត៌មានទូទៅ
ខេត្តព្រះសីហនុ ជាខេត្តដែលបានកាត់ចេញពីខេត្តកំពង់ស្ពឺ និងខេត្តកំពត នៅ ឆ្នាំ១៩៤៥ ដោយព្រះបាទនរោត្តមសីហនុ។ ក្រុងព្រះសីហនុជាទីក្រុងធំជាងគេបង្អស់នៅប៉ែកនារតីនៃប្រទេសកម្ពុជា។ ក្រុងនេះ ត្រូវបានបង្កើតថ្មី នៅថ្ងៃទី ០៤ ធ្នូ ១៩៥៩។ ឈ្មោះដើម របស់ក្រុងព្រះសីហនុ មុនឆ្នាំ១៩៥៩ គឺ ក្រុងកំពង់សោម ។ ក្រុងព្រះសីហនុ ស្ថិតនៅពាក់កណ្តាល ចន្លោះថៃ និងប្រទេសវៀតណាម ហើយទីក្រុងព្រះសីហនុ ជាទីក្រុងសំខាន់ជាងគេនៅឈូងសមុទ្រថៃ និងជាកន្លែងដែលគួរអោយ ចាប់អារម្មណ៍បំផុតសម្រាប់វិស័យទេសចរណ៍។ ខេត្តនេះស្ថិតនៅទិសនិរតីនៃព្រះរាជាណាចក្រកម្ពុជាមាន ចំងាយផ្លូវ ២៣២គ.ម ពីរាជធានីភ្នំពេញតាម ផ្លូវជាតិលេខ៤ ឆ្លងកាត់ខេត្ត ចំនួន២ ផ្សេងគ្នា គឺខេត្តកណ្តាល (ស្រុកអង្គស្នួល) កំពង់ស្ពឺ(ស្រុកសំរោងទងក្រុងច្បារមន និងស្រុកភ្នំស្រួច) ខេត្តព្រះសីហនុ (ស្រុកកំពង់សិលា និងស្រុកព្រៃនប់)។ ខេត្តនេះមានផ្ទៃដី ២៥៣៨.៦៨ គម² ចែកចេញជាក្រុងចំនួន១ (ក្រុងព្រះសីហនុ) ស្រុកចំនួន ៣ សង្កាត់ចំនួន ៥ ឃុំចំនួន២២ ភូមិចំនួន១១១ ហើយខេត្តនេះមានប្រជាជន ភាគច្រើនមានមុខរបរជាកសិករ និងអ្នកនេសាទ។ សម្រាប់ជីវភាពប្រជាជនគឺ ២០%មានជីវភាពខ្ពស់ ៥០%មានកម្រិតមធ្យម និង ៣០%នៅមានកម្រិតនៅឡើយ។ តំបន់ឆ្នេរសមុទ្រកម្ពុជា សរុបទាំងអស់មានប្រវែង ៤៤០គីឡូម៉ែត្រ ស្ថិតនៅ ៤ខេត្ដ រួមមាន ព្រះសីហនុ កោះកុង កំពត និងកែប ឬគេហៅថាតំបន់ K4 ។ I. ស្រុក និងក្រុង របស់ខេត្តព្រះសីហនុមានដូចខាងក្រោមៈ ១- ក្រុងព្រះសីហនុ ២- ស្រុកកំពង់សិលា ៣-ស្រុកព្រៃនប់ ៤- ស្រុកស្ទឹងហាវ

រឿងព្រេង
កាលដើមឡើយកំពង់សោម មានដើមកំណើតពិតប្រាកដនៅក្នុងទឹកដីនៃស្រុកស្រែអំបិល ខេត្តកោះកុង។ ហើយស្រុកស្រែអំបិលនេះ មានឈូងសមុទ្រដែលលាតសន្ធឹងរហូតមកដល់ខេត្តព្រះសីហនុ បច្ចុប្បន្ននេះ។ នៅទីនោះមានព្រៃកោងកាង និង ព្រៃឈើគ្រប់ប្រភេទ ជាពិសេសគឺសំបូរទៅដោយប្រភេទផ្តៅម្យ៉ាង ហៅថា ផ្តៅសោម ព្រមទាំងមានសត្វម្រឹគកាចសាហាវជាច្រើនផងដែរ។ ចំនែកឯប្រជាជនដែលរស់នៅតំបន់នោះ មានតិចតួចណាស់ ហើយមានជីវភាពតោកយ៉ាកលំបាកច្រើន។ ដូច្នេះពួកគាត់ប្រកបរបរចិញ្ចឹមជីវិតដោយការឡើងភ្នំ និង ចុះសមុទ្រនេសាទ។ មានប្រជាជនខ្លះនាំគ្នាទៅកាប់ផ្តៅសោម ទាំងនោះអូសបណ្តែតតាមទឹក យកមកចតនៅមាត់កំពង់មួយ ដើម្បីយកទៅប្រក់ជាដំបូលផ្ទះរបស់ពួកគាត់ និងដើម្បីលក់ប្តូរជាប្រាក់កម្រៃខ្លះដែរ។ ពួកប្រជាជនតែងតែអូសយកផ្តៅសោមទាំងនោះ មកសុំចតទុកនៅកំពង់ទឹកនោះជារៀងរាល់ពេល ទើបប្រជាជននៅតំបន់នោះហៅថាកំពង់សោម។ ចំនែកឯអ្នកស្រុកខាងកើតនៃខេត្តកំពង់ស្ពឺជាដើម បើកាលណាគេនាំគ្នាមកលេងស្រុកខាងលិច គេតែងនិយាយថា(នាំគ្នាទៅកំពង់សោមៗ គឺនៅក្នុងស្រុកស្រែអំបិលហ្នឹងឯង)។ ចុះហេតុអ្វីបានជា ខេត្តកំពង់សោម ត្រូវបានគេនិយមហៅថា ខេត្តព្រះសីហនុ វិញ?

តើលោកអ្នកគួរតែទៅកម្សាន្តទីណាខ្លះ?
ខេត្តព្រះសីហនុ គឺជាគោលដៅទេសចរណ៍ដែលមានឆ្នេរសមុទ្រដ៏ស្រស់ស្អាតនៅអាស៊ី។ ទាក់ទងនឹងប្រវត្តិសាស្រ្ត រហូតមកដល់ពេលបច្ចុប្បន្ន បានធ្វើឲ្យខេត្តមួយនេះកាន់តែមានភាពពិសេសអស្ចារ្យថែមទៀត។ ឆ្នេរសមុទ្រខេត្តព្រះសីហនុ គឺត្រូវបានចាត់បញ្ចូលជាសមាជិកនៃក្លឹបឆ្នេរសមុទ្រស្អាតបំផុតរបស់ពិភពលោក ដែលនេះគឺជាមោទនភាពមួយ របស់ប្រទេសកម្ពុជាយើងនៅលើឆាកអន្តរជាតិ។ ខេត្តព្រះសីហនុ គឺសម្បូរទៅដោយតំបន់ទេសចរណ៍សំខាន់ៗ ដែលអាចទាក់ទាញភ្ញៀវទេសចរណ៍រាប់មិនអស់មានដូចជា៖

ឆ្នេរអូរឈើទាល ជាឆ្នេរមួយដែលមានលក្ខណៈធំទូលាយ ទឹករលកធំៗខ្មួលខ្មាញ់ ប្រដេញគ្នាយ៉ាងល្គឹគ ធ្វើឲ្យអ្នករលឹកដល់អនុស្សាវរីយ៍ដែលកន្លង និង ធានាថានឹងបំភ្លេចចោលនូវក្តីមួរហ្មង ទាំងឡាយ ហើយផ្តល់មកវិញនូវភាពរំសាយអស់ទុក្ខកង្វល់ និងបានធូរស្បើយដោយសារការស្រូបយកខ្យល់អាកាសបរិសុទ្ធនៃសន្សើម និងក្លិនសមុទ្រនៃខេត្តព្រះសីហនុ។

ឆ្នេរអូរត្រេស ជាឆ្នេរមួយដែលមានសភាពស្ងប់ស្ងាត់បំផុត ក្នុងចំណោមឆ្នេរទាំងអស់នៅក្នុងខេត្តព្រះសីហនុ។ ឆ្នេរអូរត្រេស ពុំសូវមានភ្ញៀវទេសចរណ៍ជាតិទៅកម្សាន្តច្រើនប៉ុន្មានទេ ភាគច្រើនគេឧស្សាហ៍សង្កេតឃើញមានតែភ្ញៀវបរទេស ដែលទៅលេងកម្សាន្តនៅទីនោះ។ ពួកគេចូលចិត្តគេងសំដិលថ្ងៃ អានសៀវភៅ និងហែលទឹកលែងកម្សាន្ត។ លក្ខណៈពិសេសរបស់ឆ្នេរអូរត្រេស គឺជាឆ្នេរដែលមានភាពធំទូលាយមាន ខ្សាច់យ៉ាងសក្បុស ជាពិសេសគឺមានសួនច្បារដ៏ស្រស់ស្អាត និងដើមស្រល់ធំៗ គួបផ្សំនឹងសម្លេងទឹករលកដ៏ស្ងប់ស្ងាត់ គឺពិតជាផ្តល់ឲ្យអ្នកនូវបរិយាកាសបែប ឯកជន។

ឆ្នេរឯករាជ្យ ឬ ឆ្នេរ៧ជាន់ គឺជាឈ្មោះមួយដែលយកតាមឈ្មោះសណ្ឋាគារ៧ជាន់ ដែលបានសង់ឡើងនៅទីនោះ។ ឆ្នេរនេះលាតសណ្ធឹងប្រវែង១គ.ម និងមានឆ្នេរខ្សាច់ពុំសូវទូលាយប៉ុន្មានទេ តែវាជាកន្លែងដែលមានប្រជាប្រិយភាពខ្លាំង និងបានទាក់ទាញភ្ញៀវទេសចរណ៍ឲ្យមកកម្សាន្តនៅទីនោះជាច្រើនផងដែរ។

ឆ្នេរដើមជ្រៃ តំបន់នេះមិនសូវមានសភាពអ៊ូអរទេ ព្រោះភោជនីយដ្ឋានធំមួយចំនួនមកសង់ជាប់មាត់សមុទ្រ ដែលមានផលប៉ះពាល់ដល់កន្លែងកំសាន្ត ហើយជាប្រភេទរមណីដ្ឋានធម្មជាតិ។ តែអ្នកទេសចរណ៍ភាគច្រើន គេនិយមទៅកំសាន្តក្រោយពេលងូតទឹករួចដោយទីនោះមានសួនច្បារល្អហើយធំទូលាយមានរូបសំណាកដែលទើបកសាងថ្មី សម្រាប់អ្នកទេសចរណ៍ផ្ដិតយករូបភាពបានយ៉ាងស្រស់ស្អាត។

ទឹកធ្លាក់ក្បាលឆាយ ត្រូវបានរកឃើញឡើងក្នុងឆ្នាំ ១៩៦០។ រយៈពេល៣ឆ្នាំក្រោយ គេបានអភិវឌ្ឍន៍តំបន់នោះឲ្យទៅជាតំបន់ស្តុកទឹកសាប។ ក្នុងកំឡុងពេលសម័យសង្រ្គាមស៊ីវិល ទីនោះត្រូវបានពួកខ្មែរក្រហមចូលមកលាក់ខ្លួន។ នៅឆ្នាំ ១៩៩៧ ក្រុមហ៊ុន កុក អាន បានចូលមកអភិវឌ្ឍន៍កន្លែងនោះឲ្យទៅជារមណីយដ្ឋានទេសចរណ៍មួយដ៏ទាក់ទាញប្រចាំខេត្តព្រះសីហនុ។

កោះរ៉ុង និង ឆ្នេរឋានសួរគ៌ គឺជាកោះមួយរបស់កម្ពុជា ស្ថិតក្នុងឈូងសមុទ្រថៃ។ យើងអាចធ្វើដំណើរទៅកាន់កោះនេះបានក្នុងចំងាយប្រមាណជា ៤០គ.ម ពីខេត្តព្រះសីហនុ និងប្រើរយៈពេលតែ៤៥នាទីប៉ុណ្ណោះ។ នៅលើកោះមានធម្មជាតិស្រស់បំព្រង ឆ្នេរខ្សាច់ពណ៌សក្បុស ដែលធ្វើឲ្យលោកអ្នកពិតជាមិនអាចបំភ្លេចបាន ជាពិសេសគឺមានឆ្នេរមួយហៅថា ឆ្នេរឋានសួរគ៌ ដែលមានធម្មជាតិកាន់តែគួរឲ្យទាក់ទាញថែមទៀត។ លោកអ្នកអាចរីករាយជាមួយការកម្សាន្តផ្សេងៗនៅតាមកោះដូចជា ការមុជទឹកមើលផ្កាថ្ម ហែលទឹកលេងកម្សាន្ត ស្ទូចត្រី ជិះទូកកៃយ៉ាក់តាមដងព្រែកនៅក្នុងកោះ និងគេងសម្រាកតាមកញ្ជុះសម្រាប់ជួល ឬ បោះតង់សម្រាកនៅពេលរាត្រី ជាដើម។ល។ សម្រាប់គូរស្នេហ៍ថ្មីថ្មោងវិញ ក៏អាចរីករាយនឹងរាត្រីក្រែបទឹកឃ្មុំនៅលើកោះផងដែរដែលជាអនុស្សាវរីយ៍មួយដ៏ផ្អែមល្ហែមបំផុតក្នុងជីវិតអាពារហិ៍ពិពារហិ៍របស់ពួកគេ។

កោះពស់ ស្ថិតនៅភូមិ៣ សង្កាត់៣ ជាតំបន់នៅដាច់ពីឆ្នេរសមុទ្រចំងាយ ២គម នៅចំពីមុខក្រុងព្រះសីហនុ ជាប្រភេទរមណីយដ្ឋានធម្មជាតិ និងកែច្នៃ មានដូចជាមជ្ឍមណ្ឌលពាណិជ្ជកម្ម សណ្ឋាគារ ភោជនីយដ្ឋាន វីឡា កំពុងអភិវឌ្ឍនៅឡើយ។ អ្នកទេសចរណ៍ទៅលេងភាគច្រើនជាភ្ញៀវក្រុម ដោយឆ្លងតាមស្ពានមួយឈ្មោះថា តេជោមរកត មានបណ្តោយ១,០០០ម ទទឹង១៣.៥ កំពស់៤០ម ជម្រៅគ្រឹះ ៤០ម កសាងថ្ងៃទី២៤ ឧសភា ឆ្នាំ២០០៨ សម្ភោធនៅខែកក្កដា ឆ្នាំ ២០១១។ កោះនេះមានផ្ទៃដី ១២០ ហិកតា និងបរិមាណជុំវិញ៥គម។

ឧទ្យានជាតិព្រះសីហនុរាម ត្រូវបានប្រកាសជាតំបន់អភិរក្សនៅឆ្នាំ១៩៩៣ ដោយព្រះរាជក្រិត្យពីព្រោះតែតម្លៃជាតិ វិទ្យាសាស្ត្រ អប់រំ និងកម្សាន្ត និងមានផ្ទៃដីសរុបចំនួន ២១,០០០ ហិតា ក្នុងនោះមាន ១៥,០០០ ហិតា ជា ដីគោកតាមឆ្នេរសមុទ្រ និង៦,០០០ ហិតាទៀត ជាផ្ទៃសមុទ្រ ។ ដើម្បីទៅដល់ទីនោះលោកអ្នកត្រូវធ្វើដំណើរប្រមាណជា ១៨គម ពីក្រុងព្រះសីហនុ។ ឧទ្យានជាតិរាមមានឆ្នេរសមុទ្រដែលមានខ្យល់អាកាសបរិសុទ្ធ និងផាសុខភាពព្រោះនៅទីនោះវាសំបូរទៅដោយ ចំការដូង ដើមកោងកាង ព្រៃភ្នំ សត្វស្លាបជាច្រើនទៀត គួបផ្សំនឹងទេសភាពដ៏ស្រស់ស្អាត។ លោកអ្នកអាចធ្វើដំណើរតាមផ្លូវជាតិលេខ៤ ទៅកាន់ទីតាំងអាកាសយាន្តដ្ឋានកេងកង ចំងាយប្រមាណជា ១៨ គ.ម តែប៉ុណ្ណោះពីក្រុងព្រះសីហនុ។ នៅខាងឆ្វេងនៃឆ្នេរនេះគឺជាមូលដ្ឋានទ័ពជើងទឹក ប៉ុន្តែបច្ចុប្បន្ននេះគេឧស្សាហ៍សង្កេតឃើញមានអាជីវកជាច្រើនលក់ដូរនៅតំបន់នោះផងដែរ។ លោកអ្នកអាចស្វែងរកផ្ទះសំណាក់បាន ដែលជួលដោយឧទ្យានជាតិតែម្តង។ ប្រសិនបើលោកអ្នកចង់សម្រាកលំហែរកាយ ឲ្យឆ្ងាយពីភាពអ៊ូរអរ និងភាពកកកុញ សូមអញ្ជើញមកកម្សាន្តនៅឆ្នេររាមនេះ គឺជាកន្លែងដែលពិតជាធ្វើឲ្យលោកអ្នកមានអនុស្សាវរីយ៍មិនអាចបំភ្លេចបាន។

រមណីយដ្ឋានកោះសំពោធ ឬកោះរាជបុត្រ ជាផ្នែកមួយនៃឧទ្យានជាតិរាម ស្ថិតក្នុងស្រុកព្រៃនប់ ខេត្តព្រះសីហនុ។ ដើម្បីទៅកម្សាន្តនៅរមណីយដ្ឋានកោះធម្មជាតិនេះយើងត្រូវធ្វើដំណើរចេញពីផ្លូវជាតិលេខ ៤ ឆ្ពោះទៅកាន់ឧទ្យានជាតិរាម ចម្ងាយប្រមាណ ១៤គីឡូម៉ែត្រ បន្ទាប់មកយើងនឹងឃើញកូនកោះតូចមួយ បណ្ដែតខ្លួនយ៉ាងសង្ហារលើផ្ទៃសាគរ ប្រៀបបីដូចរាជបុត្រមួយអង្គ កោះសំពោធ លយចូលក្នុងផ្ទៃសមុទ្រ ចម្ងាយប្រមាណ ១៤០ម៉ែត្រពីឆ្នេរ។ តភ្ជាប់ពីឆ្នេរមួយនេះ ស្ពានឈើមួយខ្សែបន្លាយខ្លួនអូសកាត់ទឹកសមុទ្រ រង់ចាំចម្លងអ្នកទេសចរ ទៅទស្សនាកូនកោះតូចច្រឡឹង ដែលគ្របដណ្ដប់ទៅដោយរុក្ខជាតិខៀវស្រងាត់។ ជាទីឋានដ៏សែនមនោរម្យ កោះសំពោធមានបរិមាត្រប្រមាណ២៥០ម៉ែត្រ អមដោយស្ពានឈើព័ទ្ធជុំវិញ ដែលផ្ដល់ភាពងាយស្រួលដល់ភ្ញៀវទេសចរក្នុងការទស្សនាទេសភាពលើដែនកោះ។

ដំណើរទស្សនកិច្ចសិក្សារបស់សិស្សថ្នាក់ ទី១២ សាលា ប៊ែលធី អន្តរជាតិ ទៅកាន់ ប្រាសាទសំបូរព្រៃគុក
ដំណើរកម្សាន្តមហាគ្រួសារ Alliance Pharma Canbodge ទៅខេត្តព្រះសីហនុ
ប៊ែលធី ទេសចរណ៍ រៀបចំដំណើរកម្សាន្ត សម្រាប់បុគ្គលិក ទៅកាន់កោះឋានសួគ៌ ខេត្តព្រះសីហនុ